निमखाऱ्या पाण्यातील मत्स्यसंवर्धनास 'सीबा' करार ठरेल मैलाचा दगड
◾मत्स्यव्यवसाय मंत्री सुधीर मुनगंटीवार यांनी व्यक्त केला विश्वास
◾सेंट्रल इन्स्टिट्यूट ऑफ ब्रॅकिश वॉटर अँक्वाकल्चर सोबत राज्य शासनाचा करार
मुंबई ( राज्य रिपोर्टर ) : महाराष्ट्रातील निमखाऱ्या पाण्यात मत्स्य संवर्धनाच्या दृष्टीने मत्स्यव्यवसाय क्षेत्रात रोजगार आणि उद्योग वाढीसाठी करार मैलाचा दगड ठरेल असा विश्वास महाराष्ट्राचे वन, मत्स्यव्यवसाय व सांस्कृतिक कार्य मंत्री श्री. सुधीर मुनगंटीवार यांनी व्यक्त केला. विधानभवन येथे मंगळवारी मत्स्य विभाग महाराष्ट्र शासन आणि सेंट्रल इन्स्टिट्यूट ऑफ ब्रॅकिश वॉटर अँक्वाकल्चर (CIBA ) यांच्यात सामंजस्य करार करण्यात आला. यावेळी ते बोलत होते. यावेळी राज्याकडून मत्स्यव्यवसाय विभागाचे सचिव अतुल पाटणे आणि सीबा चेन्नई चे संचालक श्री. कुलदीप कुमार, वैज्ञानिक श्री. पंकज पाटील हे उपस्थित होते.
देशाला फार मोठा सागरी किनारा लाभला असून त्या भागावर उपजीविका करणाऱ्या मच्छीमार बांधवांसाठी पंतप्रधान विश्वगौरव श्री. नरेंद्र मोदी यांनी केंद्रात विशेष करुन मत्स्यव्यवसाय मंत्रालय स्थापन केले. केंद्र सरकारच्या आय सी ए आर या सर्वोच्च संस्थेअंतर्गत काम करणाऱ्या सेंट्रल इन्स्टिट्यूट ऑफ ब्रॅकिश वॉटर अँक्वाकल्चर सोबत करार झाल्याचा विशेष आनंद होत असल्याचे यावेळी ना मुनगंटीवार म्हणाले. यामुळे राज्यातील सातारा, सांगली, अकोला अमरावती या भागातील खारपान पट्टय़ातील मत्स्यसंवर्धनाचे प्रश्नदेखील सोडविण्यास मदत होणार आहे. नवीनतम तंत्रज्ञानाचा वापर करुन विविध प्रकारचे मत्स्यवीज निर्माण करणे, पालन, संसाधनांचा उपयोग करून घेणे यासाठी ही संस्था राज्याला मार्गदर्शन करणार आहे. मच्छीमार बांधवांच्या कल्याणासाठी राज्य शासन कटिबद्ध असून या सरकारने डिझेल परतावा, जाळीचे अनुदान , मच्छी मार्केट अश्या अनेक विषयांवर सकारात्मक तोडगा काढला आहे असेही ना. सुधीर मुनगंटीवार म्हणाले.
केंद्र सरकारच्या मत्स्यसंपदा योजनेत निमखाऱ्या पाण्यातील मत्स्यपालन याकडे लक्ष वेधण्यात आले आहे असे सेंट्रल इन्स्टिट्यूट ऑफ ब्रॅकिश वॉटर अँक्वाकल्चरचे संचालक श्री. कुलदीप कुमार यांनी सांगितले.
0 Comments