पत्रकार हल्ला प्रकरणातील आरोपीना अटक करून कठोर कारवाई करा-चंद्रपूर जिल्हा व्हॉईस ऑफ मीडियाने दिले जिल्हाधिकारी व पोलीस अधीक्षकांना निवेदन
चंद्रपूर,( राज्य रिपोर्टर न्युज ) : त्र्यंबकेश्वर, जि. नाशिक येथे वार्तांकनासाठी गेलेल्या पत्रकारांवर हल्ला करणाऱ्यांना तातडीने अटक करून त्यांच्यावर कठोर कारवाई करण्यात यावी या प्रमुख मागणीचे निवेदन राज्य सचिव मंगेश खाटीक यांच्या विशेष उपस्थितीत चंद्रपूर जिल्हा व्हॉईस ऑफ मीडियाचे अध्यक्ष अनिल बाळसराफ यांच्या नेतृत्वात जिल्हाधिकारी व जिल्हा पोलीस अधीक्षक यांना सादर करून पत्रकारांवरील हल्ल्याचा निषेध नोंदविण्यात आला.
दिनांक २० सप्टेंबर २०२५ रोजी (शनिवार) त्र्यंबकेश्वर, जि. नाशिक येथे वार्तांकनासाठी गेलेल्या झी २४ तास चे ब्युरो चीफ योगेश खरे, साम टीव्ही चे ब्युरो चीफ अभिजित सोनवणे व पुढारी न्यूजचे ब्युरो चीफ किरण ताजने यांच्यावर स्वामी समर्थ केंद्राजवळील पार्किंगवर कार्यरत गुंड प्रवृत्तीच्या व्यक्तींनी दगडफेक, लाथाबुक्के आदींनी भीषण हल्ला केला. या हल्ल्यात किरण ताजने गंभीर जखमी होऊन त्यांना रुग्णालयात दाखल करण्यात आले असून सध्या त्यांच्यावर उपचार सुरू आहेत.
जिल्हाधिकारी व पोलीस अधीक्षक यांना सादर केलेल्या निवेदनात तीव्र शब्दात निषेध व्यक्त करताना म्हटले की, पत्रकारांवर वारंवार होणारे असे हल्ले ही लोकशाहीला काळिमा फासणारी, चौथ्या स्तंभावर घाला घालणारी गंभीर बाब आहे. पत्रकार समाजातील सत्य घटनांचा आवाज बनतात. अन्याय, भ्रष्टाचार व सामाजिक प्रश्न प्रकाशात आणण्यासाठी ते अहोरात्र परिश्रम घेतात. अशा व्यक्तींवर होणारे हल्ले ही अत्यंत निंदनीय व असह्य बाब आहे.
या प्रकरणातील सर्व हल्लेखोरांना तातडीने अटक करून त्यांच्यावर कठोर कारवाई करण्यात यावी, राज्यातील पत्रकारांच्या सुरक्षेसाठी शासनामार्फत विशेष उपाययोजना करण्यात याव्यात, भविष्यात अशा घटना टाळण्यासाठी शासनाने ठोस व प्रभावी धोरण आखावे अश्या विविध मागण्या करण्यात आल्या.
निवेदन सादर करताना व्हॉईस ऑफ मीडियाचे चंद्रपूर जिल्हा अध्यक्ष अनिल बाळसराफ, जिल्हा सरकार्यवाह श्रीहरी सातपुते, साप्ताहिक विंगचे जिल्हा अध्यक्ष जितेंद्र जोगड, साप्ताहिक विंग जिल्हा कार्याध्यक्ष सुरेश डांगे, डिजिटल विंगचे जिल्हा अध्यक्ष आशिष रैच, राजुरा तालुका अध्यक्ष गणेश बेले, मिलिंद गड्डमवार, बल्हारपूर तालुका अध्यक्ष शंकर महाकाली, प्रमोद गल्होत, भद्रावती तालुका सचिव रवी भोगे, रवी कडूदूला यासह बहुसंख्येने पत्रकार उपस्थित होते.
0 Comments