जिल्‍हयातील मच्छिमार सहकारी संस्‍थांच्‍या तलावाच्‍या ठेक्‍याची रक्‍कम माफ करावी – जि.प. सदस्‍य संजय गजपुरे
चंद्रपूर, राज्य रिपोर्टर : चंद्रपूर जिल्‍हयातील मच्छिमार सहकारी संस्‍थांच्‍या 2020-21 या वर्षाच्‍या तलावाच्‍या ठेक्‍याची रक्‍कम माफ करण्‍याची मागणी जिल्‍हा परिषद सदस्‍य तथा भाजपाचे जिल्‍हा सरचिटणीस संजय गजपुरे यांनी केली आहे. याबाबतची निवेदने त्‍यांनी माजी अर्थमंत्री आ. सुधीर मुनगंटीवार, जिल्‍हाधिकारी चंद्रपूर यांना सादर केली आहेत.
चंद्रपूर जिल्‍हयामध्‍ये कोव्‍हीड-19 चा प्रादुर्भाव रोखण्‍याच्‍या दृष्‍टीने जिल्‍हयात लागु असलेल्‍या प्रतिबंधात्‍मक उपाययोजनांचे चंद्रपूर जिल्‍हयातील मासेमार स्‍वयंशिस्‍तीने पालन करीत आहेत. त्‍यानुसार जिल्‍हयातील मासेमारी बंद ठेवण्‍यात आली आहे.
जिल्‍हयामध्‍ये कलम 144 लागु असल्‍यामुळे मासेमार घराबाहेर निघु शकले नाही. तलावातील माशांची रखवाली सुध्‍दा करु शकले नाही. याचाच फायदा घेऊन चोरटया लोकांनी तलावातील मासे चोरुन नेले. पाणी गरम येऊन तलावातील मासे मेले. मासेमारी करण्‍याकरीता मत्‍स्‍य व्‍यवसाय विभागाकडे ई-मेल द्वारे मासेमारी करण्‍याकरीता परवानगी मिळावी म्‍हणुन पत्र व्‍यवहार सुध्‍दा केलेला आहे. मत्‍स्‍य व्‍यवसाय कार्यालयाकडुन कोणत्‍याच प्रकारची परावनगी मिळालेली नाही. त्‍यामुळे जिल्‍हयातील मासेमार संस्‍थांनी मासेमारी केली नाही. तलावातील पाणी गरम येऊन तलावातील मासे मेले त्‍यामुळे संस्‍थांचे आर्थिक नुकसान झाले आहे. त्‍यामुळे संस्‍थांची परिस्थिती हालाखिची व आर्थिकदृष्‍टया कमकुवत झाली आहे. त्‍यामुळे या संस्‍था सन 2020-21 च्‍या वर्षात तलाव ठेका रक्‍कम भरण्‍यास असमर्थ झालेल्‍या आहेत. म्‍हणुन शासनाने तलावाच्‍या ठेक्‍याची रक्‍कम माफ करावी व मासेमार संस्‍थांना दिलासा द्यावा अशी मागणी संजय गजपुरे यांनी केली. या संदर्भात संजय गजपुरे यांच्‍या मागणीच्‍या अनुषंगाने आ. सुधीर मुनगंटीवार यांनी मत्‍स्‍य व्‍यवसाय मंत्री असलम शेख व जिल्‍हाधिकारी चंद्रपूर यांच्‍याशी पत्रव्‍यवहार केला आहे.
0 Comments