परराज्यातील- परजिल्ह्यातील येणाऱ्या प्रवाशांची तपासणी गंभीरपणे करावी : खासदार बाळू धानोरकर

परराज्यातील- परजिल्ह्यातील येणाऱ्या प्रवाशांची तपासणी गंभीरपणे करावी : खासदार बाळू धानोरकर  

चंद्रपूर, राज्य रिपोर्टर : इतर जिल्हा किंवा राज्यातून येणाऱ्या प्रवाशांची स्क्रिनींग गंभीरपणे व व्यवस्थीत व्हावी यासह विविध विषयावर खासदार बाळू धानोरकर यांनी गृहमंत्री अनिल देशमुख यांचे लक्ष वेधले. ते कोरोना विषाणूच्या प्रादुर्भावाच्या अनुषंगाने उद्भवलेली परिस्थिती आणि कायदा व सूव्यवस्थेसोबत आज दि. ६ रोजी ला नियोजना भवन चंद्रपूर येथे पार पडलेल्या आढावा बैठकीत बोलत होते. 

याबैठकीत इतर विषयावर खासदार बाळू धानोरकर यांनी लक्ष वेधले. यावेळी प्रामुख्याने मंगल कार्यालयामध्ये लग्न समारंभाला परवानगी देणे, घरच्या समारंभ पेक्षा कार्यालयामध्येच सामाजिक अंतर योग्य रित्या पाळल्या जाऊ शकते. यासंबंधी जिल्हाधिकारी यांना काही दिवसांपूर्वी लॉन्स व मंगल कार्यालय व्यवसायिकांचे शिष्टमंडळ सोबत निवेदन दिल्याचेही त्यांनी सांगितले. 

  शाळा, कॉन्व्हेंट येथील विदयार्थ्यांच्या शालेय शुल्कात वाढ न करणे, शालेय शुल्क आकारणीची सक्ती न करणे, विनाकारण गणवेश बदल करून पालकांवर खर्च पाडू नये, उर्वरित शालेय शुल्क परीक्षा कालावधीत घ्यावा मागण्या खासदार बाळू धानोरकर यांनी गृहमंत्री अनिल देशमुख यांना केल्यात. या मागण्या त्वरित मार्गी काढण्याचे आदेश गृहमंत्री अनिल देशमुख यांनी जिल्हाधिकारी डॉ. कुणाल खेमणार, पोलीस अधीक्षक महेश्वर रेड्डी यांना दिले. यावेळी माजी पालकमंत्री सुधीर मुनगंटीवार, आमदार प्रतिभाताई धानोरकर, आमदार सुभाष धोटे, आमदार किशोर जोरगेवार, जिल्हा परिषद अध्यक्षा संध्याताई गुरनुले, महापौर राखीताई कंचर्लावार, जिल्हाधिकारी कुणाल खेमणार,  पोलीस अधीक्षक महेश्वर रेड्डी, यांची उपस्थिती होती.