ख्रिश्चन समाजाचे पुरातन कब्रस्तान आहे.
जिल्हाधिकारी साहेब ख्रिश्चन कब्रस्तान ची जागा वाचवा - ख्रिश्चन कब्रस्तान कमिटी बीड
बीड (राज्य रिपोर्टर) : शहरातील धानोरा रोड वर पोलीस मुख्यालयाच्या शेजारी असलेल्या पुरातन ख्रिश्चन कब्रस्तान च्या जागी काही भूमाफिया समाजकंटक प्लॉट काढून अतिक्रमण करू पाहत आहे. अशा भूमाफियांवर कारवाई करून जिल्हाधिकारी साहेब शासन प्रशासनाकडून कब्रस्तान च्या सुरक्षिततेसाठी संरक्षक भिंत बांधून द्या, अशी मागणी ख्रिश्चन कब्रस्तान कमिटी चे सचिव हॅरिसन फ्रान्सिस रेड्डी यांनी जिल्हाधिकारी यांना दिलेल्या निवेदनातून केली आहे.
निवेदनात नमूद केले आहे की, बीड शहरातील धानोरा रोड स्थित पोलीस मुख्यालय आणि राजीव नगर मधून अंकुश नगर कडे जाणाऱ्या रस्त्यालगत आमच्या ख्रिश्चन समाजाचे पुरातन कब्रस्तान आहे. काही वर्षांपूर्वी पर्यंत हे कब्रस्तान शहराबाहेर होते. मात्र आता शहराचा मोठ्या प्रमाणात विस्तार झाल्याने दूर-दूर पर्यंत लोक वस्त्या निर्माण झालेल्या आहेत. यामुळे हे कब्रस्तान आता शहराच्या मध्यवस्तीत आलेले असल्याने तसेच कब्रस्तान ला संरक्षक भिंत नसल्याने कब्रस्तान च्या जागेवर काही भूमाफिया समाजकंटकांचे डोळे भिरभिरत आहे. याचमुळे राजीवनगर येथील माजी नगरसेवक सय्यद मुस्तफा आणि निवृत्त पोलिस कर्मचारी प्रताप लांडगे यांनी मिळून आमच्या समाजातील आशिष शिंदे (जिल्हा परिषद शिक्षक) या व्यक्तीला हाताशी धरून काही रकमेचे आमिष दाखवून कब्रस्तान ची पूर्व बाजूची धानोरा रोड लगत असलेली जागा हस्तगत केली असल्याचे आम्हाला विश्वसनीय सूत्रांकडून कळाले आहे. यामुळे ख्रिश्चन, दलित व मुस्लीम समाजात तेढ निर्माण होऊन कलह होऊ शकतो. तेव्हा जिल्हाधिकारी साहेब उपरोक्त तिघांनी मिळून ख्रिश्चन कब्रस्तान ची जागा हस्तगत करण्याचा केलेला प्रयत्न हाणून पाडा. ख्रिश्चन समाजाला या कब्रस्तान शिवाय इतर कोठेही मयत दफन करण्यासाठी दुसरी जागा नाही. हे एकमेव कब्रस्तान आहे. म्हणून या कब्रस्तानला भूमाफिया समाजकंटकांपासून वाचवा आणि कब्रस्तानला संरक्षक भिंत शासन-प्रशासनाकडून बांधून द्या. जेणेकरून यापुढे कोणीही अशा प्रकारे ख्रिश्चन कब्रस्तान ची जमीन हस्तगत करण्याचा प्रयत्न करू नये. अशी मागणी ख्रिश्चन कब्रस्थान कमिटीचे सचिव हॅरिसन फ्रान्सिस रेड्डी यांनी जिल्हाधिकारी यांना दिलेल्या निवेदनातून केली आहे.
0 Comments